തിരുവനന്തപുരം: വർക്കലയിൽ വറ്റ മത്സ്യം കഴിച്ചതിനെത്തുടർന്ന് ഗുരുതരാവസ്ഥയിലായിരുന്ന യുവാവ് മരിച്ചു. വർക്കല സ്വദേശി സുധീർ (40) ആണ് തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരിച്ചത്. വെന്റിലേറ്ററിൽ പ്രവേശിപ്പിച്ചിരുന്ന സുധീർ കഴിഞ്ഞ മാസം 30നാണ് ആരോഗ്യനില വഷളായതിനെത്തുടർന്ന് ആശുപത്രിയിൽ പ്രവേശിപ്പിക്കപ്പെട്ടത്.
വറ്റ മത്സ്യം കഴിച്ചതിനെത്തുടർന്ന് 27 പേർ വിവിധ ആശുപത്രികളിൽ ചികിത്സ തേടിയിരുന്നു. ഗുരുതരാവസ്ഥയിലുള്ള ചിലക്കൂർ സ്വദേശി ഹാഷിം (17) പാരിപ്പള്ളി മെഡിക്കൽ കോളേജ് ആശുപത്രിയിൽ ചികിത്സയിൽ തുടരുകയാണ്.
വർക്കലയിലെ വെട്ടൂരിൽനിന്ന് വാങ്ങിയ മത്സ്യം കഴിച്ചവർക്കാണ് ആരോഗ്യപ്രശ്നങ്ങളുണ്ടായത്. സംഭവത്തെത്തുടർന്ന് മത്സ്യത്തിന്റെ സാമ്പിളുകൾ പരിശോധനയ്ക്ക് അയച്ചതായി ജില്ലാ മെഡിക്കൽ ഓഫീസർ അറിയിച്ചു. ആരോഗ്യപ്രശ്നങ്ങൾ റിപ്പോർട്ട് ചെയ്തതിനു പിന്നാലെ വെട്ടൂരിൽ വറ്റ മത്സ്യത്തിന്റെ വിൽപ്പന നിർത്തിവച്ചിരുന്നു.
തീരദേശ മേഖലയിൽ കഴിഞ്ഞ ദിവസങ്ങളിൽ വറ്റ മത്സ്യത്തിന്റെ ലഭ്യത വർധിച്ചതോടെ നിരവധി പേരാണ് വിപണിയിൽനിന്ന് മത്സ്യം വാങ്ങി ഉപയോഗിച്ചത്. ഇതിനു പിന്നാലെയാണ് ചിലർക്ക് ദേഹാസ്വാസ്ഥ്യം.
മത്സ്യം വാങ്ങുമ്പോൾ അതീവ ജാഗ്രത പാലിക്കണമെന്നും ഭക്ഷ്യയോഗ്യമാണെന്ന് ഉറപ്പുള്ള മത്സ്യം മാത്രമേ ഉപയോഗിക്കാവൂ എന്നും നഗരസഭ മുന്നറിയിപ്പ് നൽകി.