തിരുവനന്തപുരം: പതിനെട്ടാമത് ഐഡിഎഫ്എഫ്കെയിലേക്ക് (IDSFFK) ഔദ്യോഗികമായി തിരഞ്ഞെടുക്കപ്പെട്ട ചിത്രങ്ങൾ ഉൾപ്പെടെയുള്ളവയ്ക്ക് പ്രദർശനാനുമതി ലഭിക്കാത്ത സാഹചര്യത്തിൽ, തീരുമാനം പുനഃപരിശോധിക്കണമെന്ന ആവശ്യവുമായി ചലച്ചിത്ര അക്കാദമി കേന്ദ്ര വാർത്താ വിതരണ പ്രക്ഷേപണ മന്ത്രാലയത്തിന് കത്തയച്ചു. മേളയുടെ സുഗമമായ നടത്തിപ്പിനെ ഇത് ഗുരുതരമായി ബാധിക്കുമെന്നും വ്യക്തമാക്കുന്നു.
സെപ്റ്റംബർ 25 മുതൽ 30 വരെ തിരുവനന്തപുരത്താണ് മേള സംഘടിപ്പിച്ചിരിക്കുന്നത്. ഇതിലേക്ക് തിരഞ്ഞെടുക്കപ്പെട്ട ഔദ്യോഗിക വിഭാഗത്തിലെ 18 ചിത്രങ്ങൾ, ഇന്റർനാഷണൽ നോൺ ഫിക്ഷൻ വിഭാഗത്തിലെ 9 ചിത്രങ്ങൾ, ഫെസ്റ്റിവൽ വിന്നേഴ്സ് വിഭാഗത്തിലെ 3 ചിത്രങ്ങൾ, നേപ്പാൾ പാക്കേജിലെ ഒരു ചിത്രം എന്നിങ്ങനെ മൊത്തം 31 ചിത്രങ്ങൾക്കാണ് ഇതുവരെ പ്രദർശനാനുമതി ലഭിക്കാതെ പോയത്. മലയാള ചിത്രമായ ‘ഗ്ളോബും’ ഈ പട്ടികയിൽ ഉൾപ്പെടുന്നുണ്ട്.