പനാജി: 2013-ലെ ലൈംഗികാതിക്രമ കേസിൽ പത്തുവർഷത്തെ കഠിനതടവിന് ശിക്ഷിക്കപ്പെട്ട തെഹൽക്ക മുൻ എഡിറ്റർ-ഇൻ-ചീഫ് തരുൺ തേജ്പാൽ ഗോവയിലെ മപുസ കോടതിയിൽ കീഴടങ്ങി. ബോംബെ ഹൈക്കോടതി ഉത്തരവിനെതിരെയുള്ള അപ്പീൽ പരിഗണിക്കുന്നതിന് മുൻപ് കീഴടങ്ങണമെന്ന് സുപ്രീം കോടതി കർശന നിർദ്ദേശം നൽകിയിരുന്നു. ഇതിന്റെ അടിസ്ഥാനത്തിലാണ് നടപടി.
2013 നവംബറിൽ ഗോവയിലെ ഒരു ഹോട്ടൽ ലിഫ്റ്റിൽ വെച്ച് സഹപ്രവർത്തകയോട് അതിക്രമം കാട്ടിയെന്നതാണ് കേസ്. വിചാരണക്കോടതി വെറുതെവിട്ടെങ്കിലും, പിന്നീട് ഹൈക്കോടതി ഇയാളെ കുറ്റക്കാരനാണെന്ന് കണ്ടെത്തുകയായിരുന്നു.
കീഴടങ്ങൽ സർട്ടിഫിക്കറ്റ് ഹാജരാക്കിയാൽ ഹർജി സെപ്റ്റംബർ 22-ന് പരിഗണിക്കാമെന്നാണ് സുപ്രീം കോടതി വ്യക്തമാക്കിയിട്ടുള്ളത്.