തിരുവനന്തപുരം: ഐടി മേഖലയിലെ കൂട്ടപ്പിരിച്ചുവിടലിനെ നിസാരവത്കരിച്ച് വ്യവസായ-ഐടി മന്ത്രി പി.കെ. കുഞ്ഞാലിക്കുട്ടി. സാങ്കേതികവിദ്യ മാറുന്നതിനനുസരിച്ച് തൊഴിൽ നഷ്ടം ലോകവ്യാപകമായി സംഭവിക്കുന്നതാണെന്നും ജോലി നഷ്ടപ്പെടുന്നവർ മറ്റ് മേഖലകളിൽ തൊഴിൽ തേടണമെന്നും മന്ത്രി നിയമസഭയിൽ പറഞ്ഞു.
ലേബർ കോഡിന്റെ മറവിൽ നോട്ടീസ് പോലും നൽകാതെ 600ലേറെ തൊഴിലാളികളെ കമ്പനികൾ പിരിച്ചുവിട്ടെന്ന ആരോപണം നിലനിൽക്കെയാണ് മന്ത്രിയുടെ പ്രതികരണം. തൊഴിൽ നഷ്ടപ്പെട്ടവർക്ക് സംരക്ഷണം ഉറപ്പാക്കേണ്ട സർക്കാർ, പകരം മറ്റു മേഖലകളിൽ ജോലി കണ്ടെത്താനുള്ള നിർദേശം നൽകി ഉത്തരവാദിത്തത്തിൽനിന്ന് ഒഴിഞ്ഞുമാറുകയാണെന്ന വിമർശനവും ശക്തമാണ്.
സംസ്ഥാനത്തെ ഐടി ജീവനക്കാരുടെ തൊഴിൽസുരക്ഷ ഉറപ്പാക്കുന്നതിനും കൂട്ടപ്പിരിച്ചുവിടലുകൾ തടയുന്നതിനും സർക്കാർ എന്ത് നടപടികളാണ് സ്വീകരിക്കുന്നതെന്ന ചോദ്യം ഇതോടെ ഉയരുന്നു. കേന്ദ്രത്തിന്റെ കോർപ്പറേറ്റ് അനുകൂല ലേബർ കോഡിനെ പിന്തുണയ്ക്കുന്ന നിലപാടാണ് മന്ത്രിയുടേതെന്ന് വിമർശകർ ആരോപിക്കുന്നു.
തൊഴിൽ നഷ്ടപ്പെടുന്നവരുടെ പുനരധിവാസത്തിനും കമ്പനികളുടെ നടപടികൾക്കെതിരെ നിയമപരമായ ഇടപെടലുകൾക്കും മുൻഗണന നൽകേണ്ട സർക്കാർ, സാങ്കേതികമാറ്റങ്ങളുടെ പേരിൽ തൊഴിൽ നഷ്ടം സ്വാഭാവികമാണെന്ന നിലപാട് സ്വീകരിക്കുന്നത് തൊഴിലാളികളുടെ ആശങ്ക വർധിപ്പിക്കുന്നതായും വിമർശനമുണ്ട്.