തിരുവനന്തപുരം: ശബരിമലയിലെ പ്രതിസന്ധി പരിഹരിക്കുന്നതിന്റെ ഭാഗമായി മന്ത്രി കെ മുരളീധരനും തിരുവിതാംകൂർ ദേവസ്വം ബോർഡ് പ്രസിഡന്റ് കെ ജയകുമാറും കൂടിക്കാഴ്ച നടത്തും. ശബരിമലയിലെ നിലവിലെ സാഹചര്യം, മണ്ഡലകാല മുന്നൊരുക്കങ്ങൾ, അരവണ പ്ലാന്റ് നവീകരണം എന്നിവ ഉൾപ്പെടെയുള്ള വിഷയങ്ങൾ കൂടിക്കാഴ്ചയിൽ ചർച്ചയാകും.
അരവണ പ്ലാന്റ് നവീകരണം എപ്പോൾ പൂർത്തിയാക്കാനാകുമെന്നതടക്കമുള്ള കാര്യങ്ങൾ കെ ജയകുമാർ മന്ത്രിയെ ധരിപ്പിക്കും. ശബരിമലയിലെ നിലവിലെ സാഹചര്യത്തെക്കുറിച്ച് സർക്കാർ എഡിഎമ്മിനോട് റിപ്പോർട്ട് ആവശ്യപ്പെട്ടിട്ടുണ്ട്. റിപ്പോർട്ടിന്റെ അടിസ്ഥാനത്തിലായിരിക്കും മണ്ഡലകാല മുന്നൊരുക്കങ്ങളിൽ തുടർനടപടികൾ സ്വീകരിക്കുക.
പ്രതിസന്ധി സംബന്ധിച്ച് മുഖ്യമന്ത്രി ഇരുവരുമായും പ്രത്യേകം കൂടിക്കാഴ്ച നടത്തിയിരുന്നു. പ്രശ്നങ്ങൾ സമവായത്തിലൂടെ പരിഹരിക്കണമെന്ന നിലപാടാണ് മുഖ്യമന്ത്രിയുടേത്. അതേസമയം, പ്രതിസന്ധി പരിഹരിക്കാൻ ശക്തമായ നടപടികൾ വേണമെന്ന ആവശ്യം മന്ത്രി തൃശൂരിൽ ഉന്നയിച്ചിരുന്നു.