മരുന്നുണ്ട്, അധികാരം നഷ്ടപ്പെട്ട രോഗത്തിന് മാത്രം മരുന്നില്ല! സഭയിൽ മന്ത്രിയുടെ പരിഹാസം

തിരുവനന്തപുരം: സംസ്ഥാനത്തെ ആരോഗ്യരംഗത്തെ പ്രതിസന്ധിയും മരുന്നുക്ഷാമവും നിയമസഭയിൽ ശക്തമായ രാഷ്ട്രീയ ഏറ്റുമുട്ടലിന് വഴിവെച്ചു. ആരോഗ്യവകുപ്പ് വെന്റിലേറ്ററിലാണെന്ന പ്രതിപക്ഷ ആരോപണത്തിന് പരിഹാസരൂപേണ മറുപടി നൽകിയ മന്ത്രി കെ. മുരളീധരന്റെ പരാമർശം സഭയിൽ ബഹളത്തിനിടയാക്കി. ‘അധികാരം നഷ്ടപ്പെട്ട രോഗത്തിന് മാത്രമാണ് മരുന്നില്ലാത്തത്, ബാക്കി എല്ലാ മരുന്നുകളും സ്റ്റോക്കുണ്ട്’ എന്ന മന്ത്രിയുടെ പ്രസ്താവനയാണ് വിവാദമായത്.

മരുന്നുക്ഷാമം ഉൾപ്പെടെ ആരോഗ്യവകുപ്പ് നേരിടുന്ന പ്രശ്നങ്ങൾ ചൂണ്ടിക്കാട്ടി കെ.വി. സുമേഷ് എം.എൽ.എയാണ് അടിയന്തര പ്രമേയത്തിന് നോട്ടീസ് നൽകിയത്. ആരോഗ്യരംഗം ഗുരുതര പ്രതിസന്ധിയിലാണെന്നും സർക്കാർ പ്രശ്നങ്ങളെ ലാഘവത്തോടെയാണ് കാണുന്നതെന്നും അദ്ദേഹം ആരോപിച്ചു. മരുന്നുക്ഷാമം സംബന്ധിച്ച് മാധ്യമങ്ങൾ പുറത്തുവിട്ട റിപ്പോർട്ടുകളും അദ്ദേഹം സഭയുടെ ശ്രദ്ധയിൽപ്പെടുത്തി.

എന്നാൽ, കഴിഞ്ഞ നിയമസഭാ സമ്മേളനത്തിലും ഇതേ വിഷയം ഉന്നയിച്ചതാണെന്നും പ്രതിപക്ഷം ആരോപിക്കുന്ന തരത്തിലുള്ള പ്രതിസന്ധി ആരോഗ്യവകുപ്പിലില്ലെന്നും മന്ത്രി കെ. മുരളീധരൻ മറുപടി നൽകി. കഴിഞ്ഞ മാർച്ചിൽ പെരുമാറ്റച്ചട്ടം നിലനിന്നിരുന്നതിനാൽ മരുന്നുകൾക്കുള്ള പർച്ചേസ് ഓർഡറുകൾ നൽകാൻ കഴിഞ്ഞില്ലെന്നാണ് മന്ത്രിയുടെ വിശദീകരണം. മരുന്ന് കമ്പനികൾക്ക് വലിയ കുടിശ്ശികയുണ്ടെന്നും 24 ഇനം മരുന്നുകളുടെ ലഭ്യതയിൽ മാത്രമാണ് ചെറിയ പ്രതിസന്ധിയുള്ളതെന്നും അദ്ദേഹം പറഞ്ഞു. മരുന്നുക്ഷാമം പരിഹരിക്കാൻ അടിയന്തര നടപടികൾ സ്വീകരിച്ചിട്ടുണ്ടെന്നും മന്ത്രി അറിയിച്ചു.

എന്നാൽ, എല്ലാ പ്രശ്നങ്ങൾക്കും മുൻ സർക്കാരിനെ കുറ്റപ്പെടുത്തുന്നത് അംഗീകരിക്കാനാകില്ലെന്ന് കെ.വി. സുമേഷ് തിരിച്ചടിച്ചു. അങ്ങനെയാണെങ്കിൽ ജനങ്ങൾ സർക്കാരിനെ അധികാരത്തിലെത്തിച്ചത് എന്തിനാണെന്നും അദ്ദേഹം ചോദിച്ചു. ആരോഗ്യവകുപ്പിലെ പ്രശ്നങ്ങൾ മന്ത്രി കൃത്യമായി മനസ്സിലാക്കണമെന്നും ഉദ്യോഗസ്ഥരെ വിശ്വാസത്തിലെടുക്കണമെന്നും പ്രതിപക്ഷം ആവശ്യപ്പെട്ടു. വകുപ്പിൽ രാഷ്ട്രീയ താൽപര്യത്തോടെയുള്ള സ്ഥലംമാറ്റങ്ങൾ നടക്കുന്നതായും ഇതിൽ മുഖ്യമന്ത്രി ഇടപെടണമെന്നും പ്രതിപക്ഷം ആരോപിച്ചു.

ഇതിനിടെയാണ് പ്രതിപക്ഷത്തെ പരിഹസിച്ച് മന്ത്രി രംഗത്തെത്തിയത്. പ്രതിപക്ഷം മരുന്ന് വിതരണ ഏജന്റുമാർക്കുവേണ്ടിയാണ് സംസാരിക്കുന്നതെന്നും മരുന്നുക്ഷാമം സംബന്ധിച്ച ആരോപണങ്ങൾ ഊതിപ്പെരുപ്പിച്ചതാണെന്നും അദ്ദേഹം കുറ്റപ്പെടുത്തി. മന്ത്രിയുടെ പരാമർശങ്ങൾക്ക് പിന്നാലെ ഭരണപക്ഷവും പ്രതിപക്ഷവും തമ്മിലുള്ള വാക്പോര് രൂക്ഷമായി.

മന്ത്രിയുടെ മറുപടിയുടെ രീതിക്കെതിരെ പ്രതിപക്ഷ നേതാവ് പിണറായി വിജയനും രംഗത്തെത്തി. മന്ത്രി ഇത്തരത്തിലാണോ സഭയിൽ മറുപടി പറയേണ്ടതെന്ന് അദ്ദേഹം ചോദിച്ചു. സഭയുടെ അധ്യക്ഷനെന്ന നിലയിൽ സ്പീക്കർ വിഷയത്തിൽ ഇടപെടേണ്ടതായിരുന്നുവെന്നും മന്ത്രിയുടെ പരാമർശങ്ങളിൽ നിലപാട് വ്യക്തമാക്കേണ്ടതായിരുന്നുവെന്നും അദ്ദേഹം വിമർശിച്ചു. ഇതോടെ ആരോഗ്യവകുപ്പിലെ മരുന്നുക്ഷാമം സംബന്ധിച്ച ചർച്ച രാഷ്ട്രീയ ഏറ്റുമുട്ടലായി മാറി.