ചേർപ്പ്: അവിശ്വാസ പ്രമേയത്തിലൂടെ ബിജെപിക്ക് ഭരണം നഷ്ടമായ പാറളം പഞ്ചായത്തിൽ പ്രസിഡന്റ് സ്ഥാനത്തേക്ക് നടന്ന തെരഞ്ഞെടുപ്പിൽ കോൺഗ്രസിലെ റോസ് മേരി അപേഷ് വിജയിച്ചു. കോൺഗ്രസിന്റെ ആറ് അംഗങ്ങൾക്കും സിപിഐയുടെ രണ്ട് അംഗങ്ങൾക്കും ലഭിച്ച പിന്തുണയോടെയാണ് റോസ് മേരി പ്രസിഡന്റായത്.
പഞ്ചായത്തിൽ കോൺഗ്രസിനും ബിജെപിക്കും ആറ് വീതവും എൽഡിഎഫിന് അഞ്ച് അംഗങ്ങളുമാണുള്ളത്. മൂന്ന് മുന്നണികളും പ്രസിഡന്റ് സ്ഥാനത്തേക്ക് സ്ഥാനാർഥികളെ മത്സരിപ്പിച്ചു. ആദ്യഘട്ട വോട്ടെടുപ്പിൽ കോൺഗ്രസിന് എട്ട് വോട്ടും ബിജെപിക്ക് ആറ് വോട്ടും ലഭിച്ചു. സിപിഐയുടെ ഒരു അംഗത്തിന്റെ വോട്ടുൾപ്പെടെ എൽഡിഎഫിന് മൂന്ന് വോട്ടുകളാണ് ലഭിച്ചത്.
ആദ്യഘട്ടത്തിൽ ആർക്കും കേവല ഭൂരിപക്ഷം ലഭിക്കാത്തതിനെത്തുടർന്ന് വീണ്ടും തെരഞ്ഞെടുപ്പ് നടത്തി. രണ്ടാംഘട്ടത്തിൽ എൽഡിഎഫിലെ മൂന്ന് അംഗങ്ങൾ വോട്ട് അസാധുവാക്കിയതോടെ കോൺഗ്രസിന് എട്ട് വോട്ടും ബിജെപിക്ക് ആറ് വോട്ടും ലഭിച്ചു. ഇതോടെ റോസ് മേരി അപേഷ് പ്രസിഡന്റായി തെരഞ്ഞെടുക്കപ്പെടുകയായിരുന്നു.