തിരുവനന്തപുരം: യുഡിഎഫ് സർക്കാർ അധികാരത്തിലെത്തി അഞ്ച് മാസം പിന്നിടുമ്പോൾ ജനജീവിതവുമായി നേരിട്ട് ബന്ധപ്പെട്ട നിരവധി ക്ഷേമപദ്ധതികൾ മുടങ്ങുകയോ നിലയ്ക്കുകയോ ചെയ്തതായി ആക്ഷേപം. മുൻ എൽഡിഎഫ് സർക്കാർ നടപ്പാക്കിയ വിവിധ സാമൂഹ്യസുരക്ഷാ പദ്ധതികളിൽനിന്ന് സർക്കാർ പിന്നോട്ടുപോകുകയാണെന്ന വിമർശനവും ശക്തമാണ്.
പട്ടികജാതി–പട്ടികവർഗ വിദ്യാർഥികൾക്കുള്ള ലംപ്സം ഗ്രാന്റ് വിതരണം മുടങ്ങിയിട്ട് നാല് മാസം പിന്നിട്ടു. പഠനച്ചെലവുകൾക്കായി സർക്കാർ നൽകുന്ന ധനസഹായം ലഭിക്കാത്തത് വിദ്യാർഥികളുടെ വിദ്യാഭ്യാസത്തെ പ്രതികൂലമായി ബാധിക്കുന്നുവെന്നാണ് ആരോപണം. സംസ്ഥാനത്തെ എട്ട് ലക്ഷത്തോളം വിദ്യാർഥികൾ ഇതിന്റെ പ്രതിസന്ധി നേരിടുന്നതായും ചൂണ്ടിക്കാട്ടുന്നു.
വീട്ടമ്മമാർക്ക് പ്രതിമാസം 1000 രൂപ നൽകുന്ന സ്ത്രീസുരക്ഷാ പെൻഷൻ പദ്ധതിയും അനിശ്ചിതത്വത്തിൽ. പദ്ധതി മുൻ സർക്കാർ പ്രഖ്യാപിച്ചതാണെന്നും ഇതുസംബന്ധിച്ച് യുഡിഎഫ് സർക്കാർ ഇതുവരെ തീരുമാനമെടുത്തിട്ടില്ലെന്നുമാണ് മുഖ്യമന്ത്രിയുടെ നിലപാട്. അതേസമയം, സ്ത്രീകൾക്ക് കെഎസ്ആർടിസിയിൽ സൗജന്യയാത്ര നടപ്പാക്കിയതായി അവകാശപ്പെടുന്ന സർക്കാർ, സ്ത്രീസുരക്ഷാ പെൻഷന്റെ കാര്യത്തിൽ തീരുമാനം വൈകിപ്പിക്കുന്നതിനെതിരെ വിമർശനമുയരുന്നു.
സംസ്ഥാന വ്യവസായ വകുപ്പിന് കീഴിലുള്ള പൊതുമേഖലാ സ്ഥാപനമായ ട്രാവൻകൂർ ടൈറ്റാനിയം പ്രോഡക്ട്സിലും പ്രതിസന്ധി രൂക്ഷം. സ്ഥാപനത്തിന്റെ 80 വർഷത്തെ ചരിത്രത്തിലാദ്യമായാണ് ജീവനക്കാരുടെ ശമ്പളം മുടങ്ങിയത്. 530 സ്ഥിരം ജീവനക്കാരുടെയും നൂറുകണക്കിന് കാഷ്വൽ, കരാർ ജീവനക്കാരുടെയും ആഗസ്റ്റ്, സെപ്റ്റംബർ മാസങ്ങളിലെ ശമ്പളമാണ് കുടിശ്ശികയായത്. അസംസ്കൃത വസ്തുക്കളുടെ ലഭ്യതക്കുറവിനെ തുടർന്ന് ഉൽപ്പാദനം നിർത്തിവച്ചെങ്കിലും ശമ്പളപ്രശ്നത്തിനും ഉൽപ്പാദന പ്രതിസന്ധിക്കും പരിഹാരമായിട്ടില്ല.
എൻഡോസൾഫാൻ ദുരിതബാധിതർക്കുള്ള അവശ്യ മരുന്ന് വിതരണവും നിലച്ചിട്ട് മൂന്ന് മാസം. കാസർകോട് ജില്ലയിലെ 11 പഞ്ചായത്തുകളിലെ ദുരിതബാധിതരാണ് ഇതോടെ പ്രതിസന്ധിയിലായത്. നീതി മെഡിക്കൽ സ്റ്റോറുകൾ വഴി വിതരണം ചെയ്ത മരുന്നുകളുടെ വലിയ തുക കുടിശ്ശികയായതാണ് വിതരണ പ്രതിസന്ധിക്ക് കാരണമെന്നാണ് ആരോപണം.
18 മുതൽ 30 വയസ്സുവരെയുള്ള യുവാക്കൾക്ക് പ്രതിമാസം 1000 രൂപ നൽകുന്ന മുഖ്യമന്ത്രിയുടെ ‘കണക്ട് ടു വർക്ക്’ സ്കോളർഷിപ്പ് പദ്ധതിയും നിർത്തലാക്കിയതായി ആരോപണമുണ്ട്.
പ്രവാസി സമൂഹത്തിന് ആശ്വാസമായിരുന്ന പ്രവാസി ക്ഷേമ പെൻഷനും മുടങ്ങി. എൽഡിഎഫ് സർക്കാർ പത്ത് വർഷത്തോളം മുടക്കമില്ലാതെ നൽകിയിരുന്ന പെൻഷൻ യുഡിഎഫ് സർക്കാർ അധികാരത്തിലെത്തിയതോടെ തടസ്സപ്പെട്ടതായാണ് വിമർശനം. പതിനായിരക്കണക്കിന് പ്രവാസികളുടെയും കുടുംബങ്ങളുടെയും ആശ്രയമായ പ്രവാസി ക്ഷേമനിധി ബോർഡിനോടുള്ള അവഗണനയാണ് ഇതിന് പിന്നിലെന്നും ആരോപണമുണ്ട്.
പ്രളയബാധിതർക്കുള്ള അടിയന്തര ധനസഹായ വിതരണത്തിലും കാലതാമസം തുടരുന്നു. പ്രളയം കഴിഞ്ഞ് ആഴ്ചകൾ പിന്നിട്ടിട്ടും പ്രഖ്യാപിച്ച 10,000 രൂപയുടെ അടിയന്തര സഹായം പല കുടുംബങ്ങൾക്കും ലഭിച്ചിട്ടില്ല. ചിലർക്ക് ഭാഗികമായി തുക നൽകിയതോടെ നടപടികൾ മന്ദഗതിയിലായെന്നും അർഹരായവരുടെ പട്ടിക പോലും പൂർണമായിട്ടില്ലെന്നും ആരോപണമുണ്ട്.
അട്ടപ്പാടിയിലെ ആദിവാസി കുട്ടികൾക്കുള്ള പോഷകാഹാര വിതരണവും മുടങ്ങി. ആറ് മാസം മുതൽ മൂന്ന് വയസ്സുവരെയുള്ള കുട്ടികൾ ഉൾപ്പെടെയുള്ളവർക്കായി അങ്കണവാടികളിലൂടെ നൽകുന്ന അമൃതംപൊടിയിൽ ചേർക്കാനുള്ള ഗോതമ്പ് മൂന്ന് മാസമായി വിതരണം ചെയ്തിട്ടില്ലെന്നാണ് പരാതി. ഇതോടെ കുട്ടികളുടെ പോഷകാഹാര സുരക്ഷയും ആശങ്കയിലായി.
വിദ്യാഭ്യാസം മുതൽ ആരോഗ്യം വരെ, സ്ത്രീസുരക്ഷ മുതൽ പ്രവാസി ക്ഷേമം വരെ വിവിധ മേഖലകളിലെ പദ്ധതികൾ മുടങ്ങുന്നത് സർക്കാരിന്റെ ജനക്ഷേമ നയങ്ങളെക്കുറിച്ച് ചോദ്യങ്ങളുയർത്തുകയാണ്. അധികാരത്തിലെത്തി അഞ്ച് മാസം പിന്നിടുമ്പോൾ തന്നെ ക്ഷേമപദ്ധതികളുടെ തുടർച്ച ഉറപ്പാക്കുന്നതിൽ സർക്കാർ പരാജയപ്പെടുകയാണെന്ന വിമർശനവും ശക്തമാകുന്നു.