തിരുവനന്തപുരം: പിഎം ശ്രീ പദ്ധതിയുമായി മുന്നോട്ടുപോകണമെന്ന നിലപാടിൽ ഉറച്ച് സർക്കാർ. പദ്ധതി നടപ്പാക്കാത്തതിനെത്തുടർന്ന് വിദ്യാഭ്യാസ മേഖലയിലെ വിവിധ പദ്ധതികളിലായി സംസ്ഥാനത്തിന് ലഭിക്കേണ്ട 1607 കോടി രൂപയോളം കേന്ദ്രവിഹിതം തടഞ്ഞുവച്ചിരിക്കുകയാണെന്നും, തുക ലഭ്യമാക്കാൻ പിഎം ശ്രീയുമായി മുന്നോട്ടുപോകേണ്ടതുണ്ടെന്നും പൊതുവിദ്യാഭ്യാസ മന്ത്രി എൻ. ഷംസുദ്ദീൻ നിയമസഭയിൽ വ്യക്തമാക്കി. പദ്ധതിയുടെ തുടർനടപടികൾ സംബന്ധിച്ച് പഠിച്ച് റിപ്പോർട്ട് സമർപ്പിക്കാൻ നിയോഗിച്ച മന്ത്രിസഭാ ഉപസമിതിയുടെ റിപ്പോർട്ടിനായി കാത്തിരിക്കുകയാണെന്നും മന്ത്രി അറിയിച്ചു.
സമഗ്ര ശിക്ഷാ കേരളം (എസ്എസ്‌കെ), പിഎം ജൻമൻ, ഡയറ്റ്‌സ് ഓഫ് എക്‌സലൻസ് തുടങ്ങിയ പദ്ധതികളിലായി സംസ്ഥാനത്തിന് ലഭിക്കാനുള്ള തുകയാണ് കേന്ദ്രം തടഞ്ഞുവച്ചിരിക്കുന്നതെന്ന് മന്ത്രി പറഞ്ഞു. എസ്എസ്‌കെ പദ്ധതിയിൽ 2023–24 സാമ്പത്തിക വർഷത്തിൽ 280 കോടി രൂപയും 2024–25ൽ 513 കോടി രൂപയും 2025–26ൽ 357 കോടി രൂപയും 2026–27ൽ 433 കോടി രൂപയും ലഭിക്കാനുണ്ട്. പിഎം ജൻമൻ പദ്ധതിയിൽ 5.5 കോടി രൂപയും ഡയറ്റ്‌സ് ഓഫ് എക്‌സലൻസ് പദ്ധതിയിൽ 12.8 കോടി രൂപയും ലഭിക്കാനുണ്ടെന്നും അദ്ദേഹം വിശദീകരിച്ചു.
എന്നാൽ, പിഎം ശ്രീയിൽനിന്ന് പിന്മാറാമെന്ന് കേന്ദ്ര വിദ്യാഭ്യാസമന്ത്രി രാജ്യസഭയിൽ വ്യക്തമാക്കിയിട്ടും സർക്കാർ പദ്ധതിയുമായി മുന്നോട്ടുപോകാൻ നിർബന്ധം പിടിക്കുകയാണെന്ന് കെ.എൻ. ബാലഗോപാൽ എംഎൽഎ വിമർശിച്ചു. പിഎം ശ്രീ കരാർ അറബിക്കടലിൽ വലിച്ചെറിയാനുള്ള ആർജവമുണ്ടെന്ന് പ്രഖ്യാപിച്ച സർക്കാരാണ് ഇപ്പോൾ പദ്ധതി ഏത് വിധേനയും നടപ്പാക്കുമെന്ന നിലപാടിലേക്ക് മാറിയതെന്നും അദ്ദേഹം ആരോപിച്ചു. പദ്ധതിയിൽനിന്ന് പിന്മാറിയാൽ കേന്ദ്രവിഹിതം ലഭിക്കില്ലെന്ന വാദമാണ് സർക്കാർ ഇപ്പോൾ ഉയർത്തുന്നതെന്നും അദ്ദേഹം പറഞ്ഞു.
പദ്ധതിയിൽനിന്ന് പിന്മാറാൻ സംസ്ഥാനങ്ങൾക്ക് കഴിയുമെന്ന് കേന്ദ്ര വിദ്യാഭ്യാസമന്ത്രി രാജ്യസഭയിൽ വ്യക്തമാക്കിയ കാര്യം സേവ്യർ ചിറ്റിലപ്പിള്ളി എംഎൽഎയും സഭയിൽ ഉന്നയിച്ചു. ഒരു മാസത്തെ നോട്ടീസ് നൽകി പിന്മാറാമെന്ന കാര്യം നേരത്തെ മന്ത്രി തന്നെ വ്യക്തമാക്കിയതാണെന്നും അദ്ദേഹം ചൂണ്ടിക്കാട്ടി.
പിഎം ശ്രീയുമായി ബന്ധപ്പെട്ട നയപരമായ കാര്യങ്ങൾ പഠിക്കാൻ രൂപീകരിച്ച മന്ത്രിസഭാ ഉപസമിതി നാലുമാസമായിട്ടും റിപ്പോർട്ട് സമർപ്പിച്ചിട്ടില്ലെന്നും ചിറ്റിലപ്പിള്ളി വിമർശിച്ചു. പഠനത്തിന് ഇത്രയും കാലതാമസം വേണ്ടിവരുന്നതെന്തിനെന്നും സമിതിക്ക് വിഷയത്തിൽ അവ്യക്തതയുണ്ടോയെന്നും ചോദിച്ച അദ്ദേഹം റിപ്പോർട്ട് എപ്പോൾ സമർപ്പിക്കാനാകുമെന്ന് സർക്കാർ വ്യക്തമാക്കണമെന്നും ആവശ്യപ്പെട്ടു.